Aramba

Aramba ba (Li Indonesia Gong) no sambua wakake soli. Aramba ba Danö Niha no sambua fakake soguna ba wanuriaigö simane na so gomusola dödö ba mazui abula dödö. Omböila garamba owulo-wulo fa'ebolo mbawania mato sara ta'io, ba so zobu'u faudu wetahö ba dalunia owulo-wulo mato yai gokhö, da'ö nifotöi hagu garamba ni bözi-bözi enaö mo li. Aramba tehaogö ia moroi ba zi'öli, ba so göi moroi ba laoya (Li Indonesia kuningan). Aramba so bözi-bözinia nihaogö moroi ba geu si no labe zawu mbanio ba mbalö ba si no la'olohuni/muböbö faoma nukha-nukha, gunania enao lö adölö manandrösa geu ba garamba faböi aboto hagu ba fa tola göi owulo li.

Gambara Aramba

Fangogunaö Aramba

• Fanuriaigö na so gabula dödö, ba Danö Niha meföna na so wa'alua gabula dödö simane wa'amate niha, fa'akhozi nomo, ba tanöbö'önia. Lala salio ba wangombakha ma ba wanuriaigö ba nono wobanuasa, labözi garamba nifatete-tete manö lö mo'otalua (tidak ada jedah), na larongo niha sato ba zifasui lamane "Aramba duria" la alio'ö wangondrasi.
• Fanuriaigö gomusola dödö, famozi aramba ba gomusola dödö, lafaogö ira wamözi wakake tanöbö'ö simane göndra ba faritia mufade'a-de'a wamözi. Omusola dödö oya ngawalö simane:
  • Na so zangowalu ma fa'alua walöwa, tebözi garamba ba ginötö:
    • Fangosara dalifusö ba nomo nono matua sedöna la fangowalu, töinia na bahada Laraga lamane "Famözi Aramba". Yaia da'ö la bözi garamba waohita, la bözi garamba watao, la bözi göndra töla ma'usö, la bözi dutuhao, faritia soliwa li. Ohitö dödö ba wangombakha ba nono wobanuasa, wanuriaigö ba nono wobarahao, wa no ahatö ginötö wa'alua walöŵa.
    • Famotu ba fame'e bene'ö, simanögöi ba nomo zatua ni'owalu (Li Indonesia mempelai perempuan), fatua lö la fe'e ni'owalu ma bene'ö, ba mufalua ua wangandrö ba fanetenia labözi garamba. Ohitö dödö ba wangombakha ba nono wobanuasa, wanuriaigö ba nono wobarahao, wa no mufotu ni'owalu ba no ahatö ginötö wa'alua walöŵa.
    • Na tohare zamasao bawi walöwa sifao bawi böwö, na no ofeta zolohe bawi walöwa ba mbalö golayama, yamendrua manö na lafagaölö mbölihae ira tome, La bözi garamba ira sowatö.
    • Na tohare Nuwu simöi ba walöwa, lafaondragö wamozi aramba ira sowatö
    • Na tohare Dome simöi ba walöwa, lafaondragö wamozi aramba ira sowatö.
    • Na lafazaŵa ni'owalu mofanö dome, ba la bözi garamba ira sowatö.
  • Na alua wangowasa, ba labözi garamba wamaondragö dome sangondrasi simane Uwu, Sibaya, Sitenga bö'ö.
  • Ba na so gomusola dödö tanöbö'ö.