Baŵa nemali

Tanö niha, sambua soi ba guli danö si no la'ila niha hewisa wa'auri, fa'amozökhi hulo nia, ba si manö göi lala wahuwusa ba hegöi fariawösa fefu niha ba danö niha. Ono niha i'onarai meföna ofeta iada'a, no auri ira ba gangolifa hada si no larakö ma la osaraö dödö ira satua meföna ni lau ba wangowasa ba lafatö gara irege tobali goi-goi ni'ata'ufi nono mbanua. Hiza, ba danö niha oya zitebai-tebai manö, oya gamonita, simöi lala nitörö fefu soi.

Ba danö niha, emali no sambua turia sitehöngö ba soriri mbu'u niha na larongo, me emali bada'ö tenga ha zanga'i gama-gama ma urifö, iza'i emali ya'ia zanga'i binu, ma zanga'i högö. Mohokha mbu niha samondrongo, ba börö wa'omasi Zo'aya, no tola taya me oi tedou niha ba wamati ba no oi möi niha ba wamahaö.

Kawa-kawa samusö

Ba hulo danö niha, hulö no lafati ma la owalangigö wa na tohare gawa-kawa sa'usö, ba tandra da'ö so nemali, ba naso ba mbolo kabu ma ba gowi, ba alio-alio lalau mangawuli yomo, börö no möi ba dödöra wa naso Dano ba so nemali. Laröi halöŵöra niha, ata'u ira ma ihalö högöra emali.

Ladari

Ba kabu ma ba ndru'u, na'atö ha samösa-mösa ia, ba alio ia ösö ihalö ladari khönia mato sawuru ba iforodugö mbalönia ba ibözi-bözi, ba wangombakha ba zifaola waso niha ba zitambai da'ö. Ladari, sambua du'u sauri ba mbolo mbenua ba hulo ba danö niha. Ladari asese lafake niha göi ba wamataŵi duria, me aro sibai ndru'u da'ö. Aefa labözi ladari, emali findra naha ira me ba dödöra lamane, "so niha bada'a."

Baŵa si tölu

Ba wa'atedou wangi'ila niha he fa'atua-tua ba hegöi fa'alowalangi, no togese ma'ifu wangera-ngera dozi niha. Me mböröta ba te göi ofeta ma'ökhö wa kawa-kawa so la'a-la'a a'usö oya ira ba mbaŵa si tölu. Ba fefu niha mangelama, la zago ira we'amöi ba kabu me no tehöngö wa so nemali ba mbaŵa da'ö. Heŵa'ae ofeta ma'ökhö ba lö irai so duria nihalö nemali simane si no la fati ba tehöngö, ba turia simane da'a lötaya nasa börö me oi la fatohu niha wangombakha ba ndraono khöra irege turiania larongo iraono mane ma'ökhö.