Fagitö

Fagitö ya'ia da'ö sambua lala wama'ala fofo ba danö niha. Lalania, lahalö gitö zinanö ma sinumbua sotöi Itölio, lakhai ba la'edogö zole nahania, lahalö ndrege ni'oguna'ö, nönö famarukania, lahalö ma lakhai gitö zinanö ma sinumbua sotöi Na'a. No tobönö gitönia, ba larino, ba wangabölö'ö fa'afakitönia. Gitö si so ba zole no mege, la rino nano asoso sibai ia, ba la fuyu'ö misa ba likhe ma ono geu silö esolo sibai sitola manuge dania wofo khönia. Nano fefu la fuyu'ö misa ba likhe ma ba nono geu, amena la faigi hezo naha soya fofo. Simane fofo La'oro, nano inötö mowua atö mburune, ba oya sibai La'oro ba da'ö, gitö si no lahenagö, lahaogö lafasa ba ndraha mburune, böi la farege sibai, ena'ö lö mangelama wofo. Baero ba hogu mburune, fagitö tola ba naha gamondria wofo ba mbawa mbombo. Hiza böi ba likhe, lahalö lewuö latutusi ndrahania ma'ifu ba ba da'ö labe'e misa gitö, irege fofo simondri ba da'ö manuge ira, ba no ya'i fakitö. Fama'ala tanö bö'ö baero gitö, la fasa wuka, irege fofo sohombo aekhu ia ba wukha, ba hatö fanga'i ba niha.