Gereja Katolik ba Danö Niha
Gereja Katolik tohare ba Danö Niha ba mbaŵa si tölu ndröfi 1832, lima wulu fakhe fatua lö tohare misi Protestan me baŵa si siŵa 1865.[1][2] Irugi Danö Niha börö ndraono Niha si no tobali niha Keriso ba hulo Penang, Malaysia. Samösa ba gotalua ndraono Niha andre nibe'e töi wanasa ni'amoni'ö Francisco ba fo'omonia Sophie,[3] fao awö Jean-Pierre Vallon, samösa walito moroi ba Perancis si föföna sibai möi wanuriaigö Turia Somuso Dödö ba Danö Niha. Ha tölu waŵa me no irugi Danö Niha mate Jean Vallon Juni 1832 ba Lasarabahili, Gunungsitoli, so zanguma'ö börö wökhö malaria ba so göi zanguma'ö börö me no labunu ia.[4] Si lö'ö-lö'önia da'ö niŵa'ö Jean-Laurent Berard, si tohare ba Gunungsitoli ba wanohugö halöŵö Jean Vallon. Hiza ha tölu ngaluo me no irugi mate göi ia, ba molo'ö nituriaigö samösa niha Inggris si so ba Sumatera ba ginötö andrö, no labe'e önia langu.[5]
Iŵa'ö Tuhoni Telaumbanua bakha ba disertasi-nia Cross and Adu wa Francisco, Sophie ba Jean Vallon no misionaris si föföna sibai ba Danö Niha[3] Hiza lö ta'ila hadia zalua khö ndra Francisco ba Sophie aefa wa'amate Jean Vallon.
Ara furi hö awena tola zui tola möi walito Katolik ba Danö Niha, börö me so goi-goi me luo da'ö wa ha falito Protestan zi tola möi ba Danö Niha, börö me Tanö Niha so barö wamatörö Belanda solohi agama niha Keriso Protestan. Awena me no latibo'ö goi-goi andre, tohare zui misi Katolik me 1939[3] ba Danö Niha ni'ohe ndra falito Katolik moroi ba Belanda.
Umbu bulö'ö
- ↑ Uwe Hummel, Tuhoni Telaumbanua, Cross and Adu (a dissertation, 2007), nga'örö 93-96 (Li Inggris)
- ↑ Thomas David Dubois (Editor), Casting Faiths, Palgrave Macmillan, 2009, nga'örö 105 (Li Inggris)
- ↑ 3,0 3,1 3,2 Uwe Hummel, Tuhoni Telaumbanua, Cross and Adu(a dissertation, 2007), nga'örö 94 (Li Inggris)
- ↑ Jean Vallon, mufaigi me 23/09/2023 (Li Perancis)
- ↑ Jean Bérard, mufaigi me 23/09/2023 (Li Perancis)
Wikipedia no halöŵö nifalului zato.
Tolo Wikipedia ba wanohugö wanura ya'ia, na so khöu onönöta nösi. Saohagölö.