HP (asese laŵa'ö hape[1] ba Danö Niha heŵa'ae fasala) no adogoa wehede hand phone moroi ba li Inggris nifo'eluaha telefon genggam ba li Indonesia. Asese göi latötöi ia telepon seluler ma te'adogo'ö ponsel ba li Indonesia. Telepon nifotöi HP tefakhai ia ba menara telekomunikasi faoma ndrulu si lö oroma hörö (li Indonesia gelombang, li Inggris waves). Andrö fabö'ö sibai ia ba telefon meza nifakhaigö ba gu'ö telekomunikasi faoma tali elektronik nifotöi kabel. Da'ö göi mbörö wa asese latötöi ia fakake komunikasi si lö tali (li Indonesia komunikasi nirkabel ma li Inggris wireless communication). Si föföna sibai mamazökhi HP andre töinia Martin Cooper, sohalöŵö ba perusahaan Motorola Corp. Ba gotalua ngawalö HP so göi nifotöi telepon cerdas (li Inggris smartphone), börö me tola te'oguna'ö ia ba halöŵö bö'ö, tenga ha ba wahuhuosa ma zui ba wama'ohe'ö turia sadogo-dogo nifotöi SMS (moroi ba li Inggris Short Messaging Services).

Martin Cooper faoma DynaTAC, HP nifa'ele'önia ba zato me 1973 bahiza awena awai ba tola mu'öli me 1983
Evolusi gomböila HP i'otarai 1992 irugi 2014

Waö-waö bulö'ö

Alexander Graham Bell no si föföna sibai manöndra paten wakake nifotöi telepon (1876). Ena'ö tola fahuhuo niha faoma telepon moguna lafakhai wakake andrö faoma sinali nifazökhi moroi ba zimo itö (li Indonesia kabel). Asese ta'ila zinali telepon andre nasa nifaogö ba zinali listrik nidöni moroi ba lala lumalö ba nomo.

Heŵa'ae no so telepon nifakhai faoma sinali zimo itö andre, lö aetu la'alui lala niha ena'ö tola fahuhuo faoma telepon si lö tefakhai faoma tali bahiza faoma ndrulu radio (li Indonesia gelombang, li Inggris waves).

Si föföna sibai mamazökhi HP simanö no Martin Cooper. Me 3 April 1973 i'oroma'ö ba niha sato HP nibe'enia töi Dyna-TAC 8000X, ba hiza awena sa dania tola la'öli ia niha sato me ndröfi 1983. Bölinia me luo da'ö USD 3,995 ma ba gefe ma'ökhö (2022) USD 10,400 (Rp 164 juta).

HP si föföna andre ebua ba abua sibai. Lö aetu la'alui lala niha ena'ö abölö ide-ide ba aoha ia. Itugu ara göi itugu möi tou mbölinia. Na böli HP si föföna sibai nifazökhi Motorola Rp 164 juta (1983), tola mu'öli sambua HP faoma Rp 450.000 (2022).

Bahiza HP ma'ökhö no göi ogonekhe sibai ba wamalua halöŵö bö'ö. Iada'a so HP nifotöi smartphone (li Indonesia telepon cerdas) si tola mamalua oya ngawalö: mangai foto, mamazökhi video, mamoli sinunö, mangalui informasi ba Internet, btn.[2]

Umbu bulö'ö

  1. No sala na lasura hape, börö me sindruhunia ha faoma pe no lala wamoligö hurufo h ba hurufo p. Töra-töra börö me HP no adogoa moroi ba hand phone ma telefon genggam ba li Indonesia
  2. Srivastava, Viranjay M.; Singh, Ghanshyam (2013). MOSFET Technologies for Double-Pole Four-Throw Radio-Frequency Switch. Springer Science & Business Media. nga'örö 1. ISBN 9783319011653.
Sura andre awena börö zura nasa. Moguna munönö ba mubönökhi nösinia.
Wikipedia no halöŵö nifalului zato.
Tolo Wikipedia ba wanohugö wanura ya'ia, na so khöu onönöta nösi. Saohagölö.