Lahia soyo

Lahia soyo Lahia soyo (Li Latin Zingiber officinale Rosc.var.rubrum, li Indonesia Jahe merah) Lahia soyo na tafaigi fefu omböilania; simane wa'a, ösi, töla ba bulunia fagölö ira lahia safusi sito'ölö te'ogunaö ba naha nawu khöndra ina, ha ya'i fabö'ö la'a-la'a nösi nia oyo guli, ba simanö göi nononia sotoho-toho oyo la'ania natafaigi. Bahiza'i fabö'ö sibai raso namufelai nösinia, abölö mosinga wa'aukhunia moroi ba lahia safusi sito'ölö mufake banaha nawu.

1) Töinia ba mbanua taböbö'ö:

a. Alia (ba danö Aceh)

b. Sipodeh (ba danö Minangkabau)

c. Jahi (ba danö Lampung)

d. Jae (ba danö Jawa)

e. Jhai (ba danö Madura)

f. Reja (ba danö Bima)

g. Melito (ba danö Gorontalo)

h. Pese (ba danö Bugis)

i. Sehi (ba danö Ambon)

j. Siwei (ba danö Buru)

k. Geraka (ba danö Ternate)

l. Gora (ba danö Todore)

m. Lali ma Manman (ba danö Papua)

2) Gunania:

Famadöhö ma dalu-dalu ningo ma sibahö-bahö, fa'ambö mbadu, fangaoha wofanö ndro, fangalösi kolesteron, ba tanöbö'önia. Ni'oguna'ö ya'iada'ö  ösi mbörönia (li Indonesia rimpang)

3) Töngöni:

Tebai ibadu sotabina, ba tebai ibadu iraono sambö 2 fakhe. Mosikho!  Na'ibadu sotabina, tola adudu nono badalu. Na talafo oya mu'a/mubadu tola göna wökhö fa'aisö/fa'azaza mbetu'a ebua.

4) Lala wangehaogö tobali dalu-dalu:

a. Dalu-dalu ningo ma sibahö-bahö ba dalu-dalu fa'ambö mbadu

Ôsi mbörö lahia soyo tahalö 3 (tölu) ngawua namu'orudugö faebuania fefu mato yai adulo manu, muheta guli ba lahaogö wanasai, awena ladökhi, laferaö/latafi ba nukha sino te'ehaoni (li Indonesia bersih) tabe'e bakha ba galasi, aefa da'ö tahalö sambua ndrima sa'a tataba dalu ba taferaö badete dafi tesi tafowöi ba tafaruka banidanö lahia soyo no mege, awena tanönö nidanö sanauku-naukhu (li Indonesia hangat) irege fa'oyania fefu nano tafaruka mato sambua galasi, awena mubadu. Inötö wamadu ya'ia nano aefa manga, 3 (tölu) kali ma'ökhö, mufatete fondrege wa'ara 3 (tölu) ngaluo.

b. Dalu-dalu fangaoha wofanö ndro, fangalösi kolesteron

Ôsi mbörö lahia soyo tahalö 5 (lima) ngawua, tabogö ma muleu ba galitö böi mu'arakö, tahaogö wangeheta uli awena labobo ma latiti enaö agaboto ia ma'ifu, baero da'ö tahalö 1 (sara) döla zarilahia (li Indonesia serai) tabogö ma muleu ba galitö böi mu'arakö, tahaogö wangeheta uli/kaefe-kaefe tanö baero awena labobo ma latiti enaö agaboto ia ma'ifu, tehenaigö matonga wa'ebua gadulo manu gulo ano (li Indonesia gula aren), asio fa'ebua ngawua rigi, idanö nibadu 5 (lima) galasi. Na no ahori so, ba awena tabe'e nidanö nomege ba mbowoa side-ide sifao gulo ano, tabe'e ba dete galitö side-ide tafalökha irugi mo'otu (li Indonesia mendidih), awena tabe'e bakha lahia soyo faoma zarilahia sino mubobo megeno ba itaria tafalökha irege idanönia megeno mangalö tobali 3 (tölu) galasi awena taheta badete galitö. Inötö wamadu ya'ia nano aefa manga, 2 (dua) kali ma'ökhö (ba zahulö ba ba zibongi), mufatete fondrege wa'ara 3 (tölu) ngaluo.