Manutu Fakhe

Manutu Fakhe no sambua halöŵö si lö aetu lababaya niha ba nomo ba Danö Niha meföna ba wangehaogö ulitö tobali böra. Asese göi lalau wanutu fakhe tobali halöŵö falulusa, eluahania sambua halöŵö, heza faoma latolo nawöra niha si tefaböbö ba zi sambua ngafu.

Ira inada sanutu fakhe ba danö Dayak Halong ba Kalimantan

Ba wanutu fakhe moguna:

1. Ulitö sedöna latutu si no la okhoi'ö (lafotöi ia ulitö sasoso si no oköli).
2. Halu ni'oguna'ö ba wanutu; lafazökhi ia moroi ba geu sabe'e ba sadölö, lahaogö wanoto, la'owulo-wuloi'ö mbalö, la'aeruni dalu ena'ö aro danga zanutu.
3. Lösu nihaogö moroi ba mboto geu sesolo, lakhao, irege tola labe'e bakha gulitö ba wanutu ya'ia; so göi lösu nifazökhi moroi ba gara.
4. Niru nihaogö wanoso moroi ba guli lewuö; lafogama zingainia faoma ue nisila sino lafatahö ba no muhaogö woböbö.

Ba wanutu fakhe, tola samösa zolau ya'ia, bahiza tola göi darua, datölu ma daöfa, faoma lafalali-lali wanutu, irege lö faendronga lahandrogö halura. Na no ohama gulitö ba laheta ia moroi ba lösu ba labe'e ba dete niru. Awena latafi'ö ia ena'ö toföfö mböra awö damböni sakhökhö, ba muhombo guliho; na so limi (ulitö sifao ba mböra) ba laheta ia, laföfögö ia ba nahania.

Na so darua ma töra zanutu fakhe andre, asese göi lalau walailösa, nifagöndra-göndra hulö nifade'a-de'a, irege tola manindra-nindra gahe zamondrongo, me no baga sibai linia.

Fanutu fakhe no göi tobali famaedo wahasara dödö he bakha ba wongambatösa ba he göi bakha ba wobanuasa. Ba wanutu fakhe lafalua wafalulusa ira sanutu; faoma lataha dödöra, lö fahulö, ero ira labaloi ndrege irugi inötö gametahö khönia ba amena itutu. Lö itutu na lö ofeta wetahönia.

Ba ginötö iada'a no arakhagö taya wanutu fakhe ba Danö Niha. Hatö ya'ira si so ba halama, saröu ba naha wogili fakhe, zolau ya'ia na sa. Andrö so niha si lö mangila wa so nifotöi fanutu fakhe ba Danö Niha.