Simbi
Simbi (Li Indonesia rahang, li inggris jaw) [1]ya'ia da'ö töi ndroto-ndroto ba mboto niha, simbi nahiania ba dömba ma lafotöi ia alukha zimbi. Alukha zimbi andre dua rozi so ba gambölö ba so ba gabera ba no faondra/falemba ira tanö föna ba dömba lö faefa no fatandro, awena tola faefa na mu'odödögö wamambambö simane na latatawi ma na lafaefa simbi mbawi. Simbi andre moguna ia ba niha he göi ba gurifö simane bawi sitobali solaziö gö na baginötö wemanga ma naso ni'usu[2]. Simbi andrö so zifao khönia simane boha, ifö (gigi), ba ngingi (gusi). Ba gotalua zimbi tanö bakhania so lela (lidah), ba sifao sa'e khönia uli zimbi ba simanö göi mbewe tanö tou.
Simbi mbawi bulö'ö
Simbi mbawi ba Danö niha no ö ma sumange sebua ba hada nifalua i'otarai ndra tua moroi yawa. Na mufahö ma na mutatawi mbawi ba mohaogösibai ba wodeha simbi, me bagotalua nösi mbawi simbi andrö zabölö murorogö fa böi tekiko ba wanatawi. Mendrua manö na bawi nitatawi mu'ogunaö ia diwo ma sumange dome.
Ba wama'anö diwo ma sumange dome baero zimbi, so zilötola lö'ö zifao khönia, ya'iada'ö:
- Nagole waha, mato dombua ma zui öfa ngawua;
- Osu, mato önö ma zui walu rozi;
- Dangidangi, tambai ba tola lö'ögöi labe'e sifaudu ba hada zisambua-sambua banua;
- Söri, dua rozi;
- Beto, dua rozi;
- Ate, saga'a;
- Bua, tambai sifao tawö mbua;
- Tödö sifao mbo, tambai;
- Ate wali'a, matonga sifao wali'a.