Sinasa

Sinasa (Li Latin Pandanus, Li Indonesia pandan) no sambua zinumbua moroi ba mbulunia lafazökhi zinali ni'oguna'ö ba wamazökhi tufo, töwa ma goni ba tanöbö'önia. Asese tumbu ia ba danö sabasö-basö töra-töra ba danö sahatö ba mbewe nasi. Bulunia aganau hulö mbulu nohi ba asese so zi hulö ndroi ba mbalö ma ba zinga mbulunia. Ŵa'a zinasa ba ebua sibai ena'ö tola itaha wa'abua döla ba bulunia. Fa'anau döla zinasa tola 50cm irugi 5 meter, ba so na i ba danö Papua zirugi 15 meter. Buania hulö mbua ndruria.

Sinasa nifotöi Pandanus spathulatus

Bua zinasa nifotöi Pandanus utilis

Ngawalö zinasa

Silö'ö-lö'önia so ba zi 600 ngawalö zinasa si so ba zi sagörö ulidanö, ba gotaluania ya'ia da'ö:

• Sinasa samuhua (töi ilmiahnia Pandanus ammaryllifolius, li Indonesia pandan wangi)
• Sinasa hias (töi ilmiahnia Pandanus australis, li Indonesia pandan hias)
• Sinasa nasi (töi ilmiahnia Pandanus tectorius, li Indonesia pandan laut)
• Sinasa soyo Papua (töi ilmiahnia Pandanus conoideus, li Indonesia buah merah Papua)
• Sinasa sahiŵö (töi ilmiahnia Pandanus utilis, li Indonesia pandan Melintir)
• Sinasa safusi (töi ilmiahnia Pandanus baphtisii, li Indonesia pandan putih)
• Sinasa Afrika (töi ilmiahnia Pandanus pygmeus, li Indonesia pandan afrika)
• Sinasa sodoi
• Sinasa Surabaya
• Sinasa Laut Belang

Bua zinasa soyo (Pandanus conoideus) moroi ba danö Papua.

So göi nifotöi Sinasa bali, sasese labali'ö bunga ba nomo, bahiza sindruhunia tefaböbö ia ba nifotöi Cordyline australis ba tenga ba Pandanus.

Me September irugi Oktober 2006, lafalua LIPI awö Yayasan Kehati sambua ekspedisi wama'oli ngawalö gö soroi ba danö (li Indonesia bahan pangan alami) ba mbanua Serui ba Papua. Ba da'ö lasöndra 14 ngawalö zinasa si bohou si lö bakha ba gangolifa zinasa si no lafa'oli.

Fangoguna'ö

Moroi ba ngawalö zinasa andre so ösa zi so gunania ba wa'auri niha simane:

• Sinasa samuhua: bulunia tola la'oguna'ö ba wangomuhua simane fangomuhua mbate'e ma zui ba wamola'a-la'a ngawalö gö.
• Sinasa sodoi: na la'oköli'ö mbulunia ba tola möi beŵeŵö ba wamazökhi simane tufo, bola-bola, tofi, ba tanöbö'önia.
• Sinasa soyo Papua: buania tola möi dalu-dalu ba fonönö fa'abölö ba mboto niha.

Sinasa hias (Pandan Aeris)

Sinumbua da'a hulö sifakhili khö zinasa nitötöi faoma Aerasi ma Aeris, sobowo sa'usö. Sinasa Aeris na lafamawa ia so ba zi 15.000 rufia. Hiza, so ma'ifu wökhö zinasa da'a, ya'ia da'ö, tebai göna khönia haga zino, na tola nahiania ba zi tobini si lö göna haga zino, ma ba zondrundrumö.

Pandanus australis ya'ia da'ö, sambua wamaedo ma simbol si tehöngö moroi ba Northern Territory. Hakhi zinasa andre, mozökhi sibai, irege adöni dödö niha ba wamaigi, irege tobali sambua zinumbua nibali'ö Top End soya la halö gambarania. Hiza, tenga ha da'ö, sinanö andre, sambua zinanö so harago ba niha Aborigin Tasmania, soya tesöndra ba naha gamawaö, soya labali'ö aya-aya zoguna ba niha, ni'oguna'ö ba gö, faoma nibalö famaruka dalu-dalu. Oya gurifö sangowuloi bulu zinasa andre labali'ö nahara.

Sinasa, sinanö ma sinumbua soya ngafu, molo'ö si no la'ila niha, so 37 ngawalö ma spesies (berbeda jenis) si tesöndra ba danö ba Australia. Sito'ölönia mozawili ba danö sahatö ba mbewe nasi. Pandanus spiralis, sinasa sabölö oya ba sifao ba Top End. Asala böi aetu khönia deu ba zi so ya'ia, ha ba zoya auri zinasa da'a.

Sinasa hias, fa'alaŵania itaria so zauri ofeta 10 meter. Fa'aurinia sitedou miyaŵa, bulunia owuge'e sibai. Bulunia si no atua, falemba ba dölania, moroi ba zaröu hulö ndru'u sauri ba dölania, irege oya gutundru'u sangiagö töla zinasa da'a, simane fofo kutilang ekor panjang faoma kutilang merah asese lahaogö gazunira ba dölania, ba ifatewu ia göi ulö sombaloi önia talaho ma na so gö'ö sahatö ba döla zinasa andre.

Sinasa Melintir (Pandanus utilis)

Sinasa da'a asese latötöi faoma screwpine, me fao ia ba gangolifa monokotil tenga pinus. Sinanö da'a moroi ba Madagaskar ba la adödögö wananö ya'ia ba Mauritius faoma Seychelles. Töla zinasa da'a tumbu khönia ŵa'a sitobali fanolo khönia ba wo tafi'ö udara. Bulunia linier faoma modoi, si te'oli hulö spiral ba dölania. Bulu zinasa da'a asese lahalö, la'oköli'ö ba labali'ö tufo, simane si no la ehao ba danö Kerala, India; faoma ba Hawai. Hiza na lahalö mbulunia, moguna lada'i-da'i me oya sibai ndroi satarö.

Bua Pandanus utilis tola la'a, hiza moguna la rino awena la'a. Bua zinasa andre, adöni sibai dödö gurifö ba wemanga buania simane ba Amerika Utara katufe tagia sibai wemanga bua zinasa da'a.

Sinura

• Germplasm Resources Information Network: Pandanus Archived 2015-09-24 at the Wayback Machine
• Sorting Pandanus names
• Wagner, W. L., Herbst, D. R., & Sohmer, S. H. (1990). Manual of the flowering plants of Hawai`i.
• Pandanus species of the Wet Tropics of Queensland, Australia Archived 2016-02-19 at the Wayback Machine photos and text by Dave Kimble
• Pneumatophores on Pandanus solms-laubachii Archived 2016-02-18 at the Wayback Machine - photo essay
• Northernmost pandanus in the world, in the Azores Islands, photo.
• Pandanus simplex fruit eaten by Varanus olivaceus, Polillo Island, Philippines.
• "Hala: The Hawaiian Aphrodisiac" Archived 2011-01-29 at the Wayback Machine Article by Shannon Wianecki describing Hawaiian cultural uses for pandanus. Maui No Ka 'Oi Magazine Volume 15 Number. 1 (Jan 2011).

Khai-khai baero

• Galeri gambara mbulu zinasa
• Biological Analytics of Pandan ((Li Inggris)) Archived 2009-08-06 at the Wayback Machine