So wofo yaŵa mba'e

Fehede so wofo yaŵa mba'e, sambua famatörö li ba niha sasese mangoroma'ö wa'atohudenia simane fa'onekhenia, fa'atua-tuania, fa'abölönia, fa'asokhönia ba gotalua niha sato. Börö da'ö, andrö wa lamane niha, böi tema o sipade he, börö so wofo yaŵa mba'e. Eluahania, ba wa'auri böi tema foroma'ö sibai hewisa wa'apade, fa'onekhe, fa'asiga, fa'akayo, fa'abölö ba tanö bö'önia si tola nasa so baniha bö'ö. Na so khöda sambua moroi banidunö-dunö da'ö, ha tobali ia moguna ba niha sato. Böi bali'ö fayaŵasa, böi möi famözi-mözi niha ba wehede, yamendrua na möi fangailasi niha, da'a zilö fao dödö niha sato, andrö wa aekhulania dania tola fatötöi. Na so zonekhe ba gotalua niha sowulo, ha ihaogö manö böi möi fangailasinia, börö tola manö onekhe ba zisambua lala, ba lö ta'ila hewisa ba lala tanö bö'ö. Sibagania, so baniha wangera-ngera wa so wofo yaŵa mba'e, he no maulu wa'abölö zisamösa niha, ba sonasa zabölö moroi khönia, he tenga bada'a so'ia tola manö ba zifasui ya'ita.

Ba danö niha, oi la'ila fefu niha wehede da'a. Naso ba gotalua zombaso, imane, hadia zura da'a, da'ö dandrania wa iraono nasa ia, lö fakhamö irongo wehede simane da'a. Ba gangowuloa, gofu hezoso misa, ba ira satua asese labe'e mene-mene ba lafake wehede da'a, ena'ö fefu ndraono sibohou ebua, lö manendre ira ba wamalua fefu ni orudugö söndra. Ösi wehede da'a yaŵa ya'ia bawanguma'ö ba niha, wa sifaoma fabe'e ba li. Lö si ya'ia sibai, oi so wa'amo'amböta zambua zamösana. Ba hiza börö wahasara dödö tola orudu zöndra ba möi fa'abölö ba wa'owulo ba zisambua angowuloa.

Kiasa

Fehede nisura da'a yaŵa tenga fohasa, hiza i sambua kiasa, ba wame'e gambara ba niha sifahuhuo ma si gamaretefö wa böi hulö ö fagölösi manö fefu niha, börö tawai ha ya'ita zangila sindruhunia ato niha tanö bö'ö göi zangila ni'ilada da'ö. Ono mbanua ba danö niha, no to'ölö ba wolau amaedola ma ba li salio lamane kiasa, me da'ö lala ena'ö lö tetutu dödö niha samandrongo ngawua wehede zisamösa niha. Kiasa aröu fabö'ö moroi ba wohasa. Na fohasa, ya'ia da'ö fa asiliyaŵa, da'a langu wa'auri ba nituwuni niha. Solau fohasa ya'ira silö mangila wa so wofo yaŵa mba'e.

Hana wa ba'e

Ba'e sambua auriföa si so ba ndru'u sino la'ila niha salio manga'i önia na inötö ilau manga. Ba ginötö i'ila so gö bada'ö, simane gae, iwalinga ha ya'ia ziso ba naha fondrege zalaŵa, irege olifu ia wa oya danö bö'ö zalaŵa moroi khönia. Ba ginötö i'a gae yaŵa ba hogu gae, lö idöna-döna tohare wofo so'afi, sohombo ba ladou gae si so fönania, andrö wa lö manö irasoi ba'e wa no ahori gönia gae ladodou wofo irege okolingö ba wangera-ngerania me iwai ha ya'ia ziso ba naha fondrege zalaŵa. Sambua famahaö sebua ba niha ba guli danö ena'ö sifaoma fa be ba li, irege lö fatötöisa ba gotalua wahuwusa, fatalifusöta, angowuloa, ba naha wahasara dödö tanö bö'ö.

Mangelama

Nifalua zangila waso wofo yaŵa mba'e, ya'ia da'ö so khönia wangelama. Fangelama sambua lala wa'auri sisökhi irege lö fa'asala he ba wehede, he ba gamuata. Na ba'e i'ila waso wofo yaŵania, ba izago ia, mangelama ia, irege lö ahöwö ia önia gae soso ba hogu gae. Ba hiza börö me ambö i'ila andrödania falukha ia waniasa börö me tohare wofo sedöna mamadöni önia. Na irasoi wa da'ö sambua fetaro wa ya'ia ha sanema fa'omasi zokhö gae, lö ibe'e badödönia waya'osa, ibe'e ba niha tanö bö'ö ngawalö hadia ia zitola, me fefu oi so lala nia. Mangelama möi fanga'azökhi niha irege irasoi wa tenga ha ya'ia zitola, niha bö'ö göi tola lafalua zimane nifaluania.

lela ba nifö

Fangelama ba danö niha, no sambua lala wa'auri dozi niha. Mangelama sambua lala ba wondrorogö boto, wo ndrorogö ngambatö, wo ndrorogö lala halöŵö, fangenanöi wehede. Fangelama moguna sibai ba wame'e fa'ata'u ba niha ba wamalua sambö sökhi. Lamane ba gamaedola zatua "Mangelama lela ba nifö" eluahania na lö sökhi gamuatada ba tola sifahatö manö khöda ba tola fatötöi, lö sitola manaha hewisa na manendre niha, andrö imane lela mangelama ia ba nifö, ida'i-da'i na inganga ena'ö lö i usu lelania.

Adulo fatiti

Moroi ba danö niha, no oya zitebai-tebai manö. Hada ba amonita wa'oya ba danö niha. Ba tenga fa'ate'ala da'ö, no sambua fama'anö dozi niha ena'ö lö te'ala ba oi sisökhi huku. Nifotöi fatötöisa oi manö so naha nia, mana na gadulo ba hele-hele ba oi fatiti, eluahania so wangera-ngera ba zisamösa niha wa ba wa'auri andre bagotaua zisambua ngambatö, zifatalifusö, sifahuwu, zi sambua banua, tola tesöndra manö watötöisa. andrö wa ba wanönö lala wa'auri böi tamane dödöda lö manö anendrea, börö me lö manö safönu wa'asiya'ia niha, heno maulu wangi'ila ba so manö zilö i'ila.