Soroso Barelang

Soroso Barelang no sambua soroso sanau si so ba Provinsi Kepulauan Riau, fetaro ba Kota Batam. Barelang sindruhunia fehede ni'adogo'ö moroi ba wehede sanau, Ba (Batam) Re (Rempang) Lang (Galang). Barelang no sambua soroso fondröni dödö niha samaigi, Soroso samatohu hulo. Soroso sitola naha wakodasa ba niha simöi manörö ba da'ö. Fefu nisura ba zura da'a la sura ba gangolita wehede moroi yöu

Soroso Barelang I - Fisabilillah ma lawa'ö Jembatan I Barelang Siso ba Kota Batam

Itaha 100 Fakhe

Soroso Barelang ma Jembatan Barelang si so ba danö Batam andre, no sambua soroso sitobali fondrou'ö wa'aterou dödö ndra niha moroi ba negara tanöbö'ö we'amöi mamaigi, me no baga sibai wangehaogö ya'ia. Ba tenga ha fa'abaga ba wamaigi simane, asi sino so barö zoroso. Na soroso sito'ölö ba mbanua bö'ö ha ba wama'ötö niha ba mbawa nidanö. Na soroso Barelang, fama'ötö niha ba nasi si so ba gotalua hulo. Soroso Barelang andre, ba lahaogö no fondrege wa'asökhi ba simanö göi hewisa wa'aro nia. No lahaogö döla-döla segesolo, sitola bataha irugi otu fakhe (100 tahun). Soroso Jembatan I Barelang andre, labe'e döi Jembatan I ya'ia da'ö Fisabilillah, bataha ba nangi, tatu tebai sa'ae niŵa'ö na dulu danö zanörö. Baero wa'abaga zoroso Barelang andre, ba Jembatan I, no lahenagö göi itaha ndrege dua wulu ribu kilo (20 Ton) wa'abua zanörö yaŵa detenia.

Ondröita BJ Habibie

Saohögölö khö zatuama Presiden nomoro tölu Indonesia, BJ Habibie. Sambua zilö olifu niha götö danö, ya'ia da'ö Soroso Barelang ma Jembatan I Barelang da'a ondröita nia ni'angeragönia hewisa wangahaogö soroso salaŵa ba dete nasi ba ifatu'a ma ifatöfa hulo. Sambua gondröita nia soguna khöda sauri nasa. No ya'ia zo'angeragö, ba sogambaraini mege soroso andre, irege awai me döfi sara ngahönö a siŵa ngaotu a siŵa wulu a fitu (1997). Soroso da'a ba no tola la rugi niha sanörö köfa sihombo si turu ba bandara Hang Nadim Batam ha ndrege sambua za tola ofeta, ba sino sa'ae möi ohitö ndra talifusö simöi manörö ba Batam wondrugi sosoro ma Jembatan I Barelang andre, me no awakhö-wakhö haga zino moroi ba gaekhula na ero bözi lima ofeta bözi önö tanö owi. Baga sibai naha fakoda. Hezo fetaro so'ia, faigi manö gambara danö si so ba zitambai sisa.

Fa'anau Zoroso

Soroso I Barelang, ma Jembatan I Barelang fa'anau nia fefu önö ngaotu a öfa wulu arua mete (642 m), soroso da'a so dombua lala (dua jalur) ba fa'ebolo tölu ngafulu a ŵalu mete (38 m) , sangahaogö ya'ia Kontraktor pelaksana ya'ia da'ö PT Hutama karya faoma subkontraktor ba so dombua perusahaan, ya'ia da'ö PT Ballast Indonesia dan PT VSL Indonesia, ba so aturai fefu ngawalö zoguna ba wangahaogö soroso (manajemen kontruksi) ni'ohalöŵögöi PT Profes Cipta Wahana Teknik.