Figa faoma idanö ba bulu ndru'u ni'oguna'ö ba wangandrö howu-howu. Asese sibai ta'ila da'a ba Danö Niha na möi ndraono ba wangandrö howu-howu moroi khö zatuara. Tradisi simane so göi ba Niha Keriso. Irugi ma'ökhö na möi ita bakha ba Gereja Katolik, so nahia nidanö ni'amoni'ö ba mbawa ndruhö. Idanö andrö no föfö nidanö ni'oguna'ö ba Wanasa Ni'amoni'ö ba ginötö Paska. Idanö andrö no fanörötödö me tatema wanasa tobali ita ono Lowalangi. Ba ero möi ita bakha ba Gereja ba tahalö ia ba tetewegö ba gangangoda, hulö wangandrö da'ö ena'ö ifahowu'ö ita Lowalangi.