Diponegoro
Diponegoro ma asese lakaoni ia Pangeran Diponegoro no samösa moroi ba gotalua niha nibe'e töi "pahlawan nasional"[1] ba negara Republik Indonesia. Tumbu ia me 11 November 1785 ba labe'e khönia döi Raden Mas Antawirja. Töi safönu khönia ya'ia Bendara Pangeran Harya Dipanegara. Me 8 Januari 1855 mate ia ba Makassar, me irugi 69 fakhe ndröfinia. Tehöngö ia börö me tobali ia sondrönia'ö ba wasuwöta wolaŵa wamatörö Hindia Belanda ba danö Jawa i'otarai 1825 irugi 1830. Andrö wa to'ölö lakaoni khönia Pangeran Diponegoro. Ato zimate ba wasuwöta andrö: arakhagö 200.000 niha Jawa, 7.000 niha moroi ba danö tanöbö'ö ba Indonesia, ba 8.000 zaradadu Hindia Belanda. Molo'ö fangerai afufu töra 25 juta Gulden gokhöta börö wasuwöta andre.
| Pangeran Diponegoro | |
|---|---|
 Pangeran Diponegoro | |
| Tumbu | Raden Mas Antawirya 11 November 1785 Ngayogyakarta Hadiningrat |
| Mate | 8 January 1855 (ndröfi 69) Makassar, Hindia Belanda |
| Burial place | Kampung Melayu, Wajo, Makassar, Sulawesi Selatan |
| Tehöngö ia börö |
|
| Title | Sultan Abdul Hamid Pangeran Harya Dipanegara |
| Fo'omo | Raden Ajeng Ratu Ratna Ningsih |
| Satua |
|
Fa'a'iraono ba fa'ebua-bua
bulö'öTumbu Diponegoro ba Yogyakarta me 11 November 1785. Inania sotöi R.A. Mangkarawati no samösa donga ba zinga (li Indonesia: selir) moroi ba Pacitan. Töi namania Gusti Raden Mas Suraja, si tobali dania Hamengkubuwana III.[2] Töi ba wa'ide-ide khönia ya'ia Bendara Raden Mas Mustahar, ba hiza furi hö lakaoni khönia Bendara Raden Mas Antawirya.[3] Bakha ba agama Islam lakaoni ia Abdul Hamid. Dania me tedou mbosi namania, tobali ia samösa "pangeran" nikaoni Bendara Pangeran Harya Dipanegara.
Me ebua-bua ia, omasi sibai namania na tobali ia Sultan, ba hiza lö omasi ia ifönui dötönafö namania andrö. Ibe'e tahinia wa inania ha donga ba zinga, ba wangera-ngerania sa börö me tebai ia wangai noro tobali Sultan.[4]
Ba ginötö da'ö tefaogö Pangeran Diponegoro ba gangolifa niha sonekhe, satua-tua, soya mombaso, ba ere huku agama Islam-Jawa.[2] Hiza, abölö adöni dödönia ba ngawalö si fakhai ba agama moroi ba zi fakhai ba wamatörö gödo razo (li Indonesia: keraton). Tenga göi ba keraton toröi ia, bahiza ba Tegalrejo, Yogyakarta, banua sahatö ba mbanua gawenia sotöi Gusti Kangjeng Ratu Tegalrejo, donga Sultan Hamengkubuwana I.[4]
Awena tö adöni dödönia ba keraton, me latuyu ia tobali samösa moroi ba gotalua ndra fangali (li Indonesia: anggota perwalian) sanundreheni ngawalö halöŵö Sultan Hamengkubuwana V (1822). Lö ara, tölu fakhe aefa da'ö, tobali ia tanga kambölö khö Hamengkubuwana V, heŵa'ae Patih Danureja IV awö Residen Belanda zanundreheni halöŵö si ero ma'ökhö. Hiza lö fao dödö Pangeran Diponegoro ba lala wamatörö simane da'a, irege ifa'ema wa lö fao dödönia andrö.[4]
Fa'auri
bulö'öMolo'ö nidunö-dunö omasi-masi Pangeran Diponegoro andre monganga afo, moroko "sigaret Jawa" nifagaölö awö wa oya i'irö'ö gana'a ba ilau mokabu. Ba naha wangandrö nifotöi "semedi" ba Selorejo, oya itanö mbunga, bulugeu awö sinanö sowua. Baero da'ö ba nahia andre i'uri gi'a, bo'ole ba fofo nifotöi tekukur, buaya ba harimo. Pangeran Diponegoro samösa no niha somasi sibai wemanga roti nibogö awö gowi Balanda sasese ifaruka faoma lada awö karufu gowirio.[5]
Umbu
bulö'ö- ↑ Lafotöi "pahlawan" samösa niha si no oya nilaunia ba wondrou'ö ena'ö aefa Indonesia moroi ba wamatörö niha bö'ö (li Indonesia: merdeka) ba afuriatania mate ia börö wobelegö negara Indonesia. Lö ero niha zanöndra töi pahlawan. Ha ya'ira si no ituyu negara tola lafotöi pahlawan nasional.
- ↑ 2,0 2,1 "Memenuhi Ramalan Pangeran Diponegoro". Historia (ba li Indonesia). Arsip moroi versi asli irugi 2022-08-27. Mufaigi me 28-08-2022.
- ↑ Raditya, Iswara N. "Intrik Keraton dan Misteri Kematian Sultan Hamengkubuwana IV". tirto.id (ba li Indonesia). Mufaigi me 28-08-2022.
- ↑ 4,0 4,1 4,2 "Pangeran Diponegoro Komandan Perang Jawa". Tagar.id (ba li Indonesia). 2017-12-23. Mufaigi me 28-08-2022.
- ↑ "Tujuh Kebiasaan Pangeran Diponegoro yang Belum Diketahui Banyak Orang". Historia.id (ba li Indonesia). Mufaigi me 2020-03-20.