Wikipedia

Barnabas Johan Winkler

falito Katolik moroi ba Brixen

Barnabas Johan Winkler, O.F.M.Cap., (19.6.1939 - 6.11.2020) ya'ia da'ö no samösa falito Katolik moroi ba Brixen, Tirol, Italia, sohalöŵö ba Danö Niha ba ba Zibolga. Oya halöŵö wondrönia'ö si no igogohe he bakha ba Ordo Kapusin ba he göi bakha ba Keuskupan Sibolga.

Baero da'ö tehöngö ia tobali samösa nifotöi arsitek autodidak samahaö ya'ia samösa ba wama'anö ba ba wotomosa oya nomo ba ngawalö nomo (kompleks bangunan) si muzawili ba Danö Niha, Sumatra irugi Flores. Töra-töra aefa ndruru sebua ba Danö Niha me ndröfi 2005, la'ila niha wa ya'ia sotomo omo saro si lö adudu ba abökha he ifaheu ndruru.

Ero niha sanörö köfa si lalö ba Danö Niha, ba na larugi pelabuhan Gunungsitoli si lö tola lö'ö la'ila nahia nomo yaŵa ba hili soroyo-royo nifotöi Biara Laverna, da'ö sambua moroi ba gotalua ngawalö wotomo nifalua Barnabas. Biara Laverna andre faoma fotomonia tanö bö'ö Biara Santa Klara, Gunungsitoli, no dombua moroi ba ha'uga ngawua nomo ba kompleks nomo si lö hadia ia me alua ndruru sebua 2005.

Lala wa'auri bulö'ö

Barnabas tumbu ba Sankt Andrä, Brixen, Italia, me 19 Yuni 1939 ba labe'e döinia Johan. Me no ebua-bua ia, faoma akhinia Wilfried, möi Johan tobali awö bakha ba Ordo Kapusin ba tetema'ö ia me 28 Agustus 1959 ba ihalö döi Barnabas. Me 29 Agustus 1963 ibe'e hölunia irugi wa'amate ba wa'auri fa'alowalangi ba nifotöi kaul kekal. Me no awai mamaha'ö ia ba filosofi ba ba teologi tefahowu'ö ia tobali ere kapusin me 29 Juni 1968 faoma akhinia Wilfried.[1][2]

Ba hiza me ndröfi 1970 ibua'gö ia Barnabas ba akhinia Wilfried lumalö ba Danö Niha tobali falito.[3] Labe ba hulunia wamaha'ö ndraono matua si bohou ebua somasi mohalöŵö ba kabu Lowalangi ba Gunungsitoli. Tölu fakhe aefa da'ö labe noro dödönia wangotomosi omo ndraono matua nifaha'ö andrö.[3] Ba ibörötaigö ifomaha samösa ia ba halöŵö si to'ölö lafalua ira arsitek ba insinyur.

Omo ni'otomosinia andrö ha böröta moroi ba halöŵö tanö bö'ö nibe noro dödönia. Börö tölu fakhe aefa da'ö ba ndröfi 1976 labe zui noro dödönia wangotomosi kompleks fondrege ebua ba ahöli dödöda sanaha ndruru danö 30 fakhe aefa da'ö, ya'ia da'ö Biara Santa Klara, Gunungsitoli ma zui asese la'adogoi'ö wanguma'ö Biara Klaris.[1][4] No simanö, moroi ba zi sambua omo, tobali dombua ba tölu ba tanö bö'önia, oi muzawili misa tenga ha Danö Niha. So göi ni'otomosinia andrö nifogaba-gaba moroi ba motif-motif hada Nono Niha simane soroma ba Gereja Katolik Hati Kudus Yesus, ba Telukdalam, Nias Selatan. Oya foto moroi ba Gereja andre tola mufaigi ba Google Maps, si no tobali sambua nahia nifaigi-faigi turis ba Telukdalam.

Baero halöŵö andre, itohugö göi Barnabas halöŵönia ba wa'alowalangi si tobali pastor awö halöŵönia si tobali sondrönia'ö bakha ba Ordo Kapusin ba aefa da'ö bakha ba Keuskupan Sibolga. Tola muŵa'ö wa hulö no tumbu ia tobali sondrönia'ö, börö sagötö fa'aurinia ba Indonesia lö aetu tefili ia tobali sondrönia'ö he bakha ba Ordo ba he bakha ba Gereja. Simane nisura uskup Keuskupan Sibolga samösa, Mgr. Anicetus Sinaga, "No so khönia talenta ba wondrönia'ö ndra falito Kapusin Belanda, Jerman, Swiss ba Italia awö ndra Kapusin niha Indonesia me tobali ia Minister Propinsial Kapusin Indonesia, si no mufarahugö Kalimantan, Medan ba Sibolga."[5]

Me no ibörögö halöŵönia ba wamahaö ndraono matua si bohou ebua somasi mangai halöŵö fa'alowalangi, tefili ia tobali sondrönia'ö Ordo Kapusin Regio Sibolga tölu kali 1978, 1981 ba 1984.[3][6]

Me tefasindro Ordo Kapusin Propinsi Indonesia ba ndröfi 1985, si no mufarahugö Pontianak, Medan ba Sibolga/Nias, Barnabas tefili tobali sondrönia'ö propinsi si bohou andre, ba ifuli tefili ia zui me ndröfi 1988. Si manö göi me tobali propinsi gölana Kapusin Sibolga/Nias ba ndröfi 1990, tefili Barnabas tobali propinsial si föföna, ba tefili zui me ndröfi 1994 ba aefa da'ö 1997.[6]

Baero duho halöŵö andre tobali göi ia nifotöi Superior Kongregasi ndra Suster OSF moroi ba Reute, Jerman, sohalöŵö ba gölana Keuskupan Sibolga, aefa da'ö tobali ia samene'ö (penasehat rohani) ndra suster Klaris OSCCap, Gunungsitoli.[7][8] Ba hiza tenga ha tebato ba da'ö göi halöŵönia. Ya'ia göi zondrou'ö we'aso nifotöi imam projo ba Keuskupan Sibolga, ya'ia da'ö ira pastor si teböbö khö samösa uskup. Börö da'ö tefotöi göi Barnabas hulö arsitek wondrou'ö imam projo ba Keuskupan Sibolga.[9]

Heŵa'ae no oya halöŵönia, ba asese la'andrö göi ia wame'e nifotöi retret religius (samigu ginötö ba wangerönusi fa'auri fa'alowalangi) ba zi ha'uga gölana ba Indonesia.[10] Töra-töra isura samösa uskup Keuskupan Sibolga wa no isöndra wanolo sebua moroi khö Barnabas me ihalö oya gangetula he ba wa'aurinia samösa ba he ba keuskupan.[11]

No göi irai tobali Barnabas ekonom Keuskupan Sibolga irege ituyu ia Paus ba Roma tobali Administrator Diosesan Keuskupan Sibolga me 3 Januari 2004, börö me luo da'ö tewu'a halöŵö Uskup Anicetus Sinaga tobali Uskup Agung Keuskupan Agung Medan. Igogohe halöŵönia andre Barnabas irege tetuyu uskup sibohou, Mgr. Ludovicus Simanullang, O.F.M.Cap., me 14 Maret 2007.[12]

Lö ara me no tetuyu ia tobali Administrator Diosesan alua ndruru sebua ba Danö Niha me ndröfi 2005. Ba ginötö andrö so Barnabas ba Gunungsitoli ba Pastoran Santa Maria, Jln. Karet. Börö ndruru danö sabölö-bölö adudu ösa nahia si so ya'ia irege mesokho abölö-bölö ia.[13]

Ha wa'ahakhö dödö niha, börö me no irai iŵa'ö khö zamotomo (kontraktor) omo andrö wa lö aro ni'otomosi andrö na alua ndruru danö. Ba hiza me luo da'ö lö lafondrondrongo mene-menenia.[6][14]

Heŵa'ae döhö ia moroi ba zokhonia ba itohugö na sa halöŵönia tobali Administrator Diosesan irugi 2007, botonia no mo'amböta sibai wa'abölö. Börö da'ö la'ohe ia ba Jerman me ndröfi 2010 ba wangalui dalu-dalu sabölö fagöna. Ba hiza no oi tebai sibai dölania sa'ae, irege mangawuli ia ba Indonesia faoma si'o. Tebai sa'ae mohalöŵö ia si mane me föna, toröi manö ia ba Biara Yohaneum, ba Zibolga, irugi wa'amatenia ba Rumah Sakit Santa Elisabeth ba Medan me 6 November 2020.[3]

Bakha ba buku "Horizonte. Jahresbericht 2018" moroi ba Ordo Kapusin Jerman ba Kongregasi OSF Jerman, so sambua zura sanandrösa Barnabas "Ere ba Arsitek We'aso ndra Kapusin" (ba Li Jerman). Högö andrö no hulö furugö wa'auri ba halöŵö Barnabas, si tobali arsitek wa'auri fa'alowalangi ba niha sato, göi arsitek samazökhi omo.[8]

Halöŵö bulö'ö

No oya nomo ba kompleks nomo nifa'anö Barnabas. Ba gotaluania:

  • Biara Kapusin Laverna, Gunungsitoli
  • Biara Santa Klara, Gunungsitoli
  • Gereja Katolik Paroki Santo Fransiskus, Gunungsitoli
  • Gereja Katolik Hati Kudus Yesus, Telukdalam

Sagötö fa'aurinia ba Indonesia no oi ihalö halöŵö zondrönia'ö Barnabas. Bakha ba sambua filem dokumentasi lafotöi Barnabas "tumbu tobali sondrönia'ö".[14] Halöŵö wondrönia'ö ba gotaluania:

  • Sondrönia'ö Ordo Kapusin Regio Sibolga (1978-1981, 1981-1984, 1984-1985)
  • Propinsial Kapusin Propinsi Indonesia (1985-1988, 1988-1991)
  • Propinsial Kapusin Propinsi Sibolga (1991-1994, 1994-1997, 1997-2000)
  • Ekonom Keuskupan Sibolga (2001-2004)
  • Administrator Diosesan Keuskupan Sibolga (3 Yanuari 2004 - 14 Maret 2007)

Börö halöŵö segebua si no ifalua bakha ba Keuskupan Sibolga, ifotöi ia Mgr. Anicetus Sinaga, "Barnabas no samasindro (founder) Kapusin Sibolga, ba fao ba wamasindro (cofounder) Keuskupan Sibolga".[15]

Sura bulö'ö

Pater Barnabas Winkler OFMCap. Ahli Pembangunan Fisik dan Kerohanian yang Visioner, Inspiratif dan Bersahaja, Ordo Kapusin Kustodi General Sibolga, Sibolga, 2018.

Umbu bulö'ö

  1. ↑ 1,0 1,1 P. Barnabas Winkler - 40 Jahre Priester, Kontinente, Beilage Kapuziner/Franziskannerinnen, Kontinente 6/2008, nga'örö VIII.
  2. ↑ Katalog Kapusin Propinsi Sibolga 2010, nga'örö 4.
  3. ↑ 3,0 3,1 3,2 3,3 Missionssekretariat der Kapuziner Provinz Österreich-Südtirol, Totenbrief, 6 November 2020.
  4. ↑ Ein halbes Jahrhundert Missionsarbeit in Sibolga/Sumatra Archived 2020-09-25 at the Wayback Machine, mufaigi me 6 November 2020
  5. ↑ Pater Barnabas Winkler OFMCap (2018), nga'örö. 9 ba 12.
  6. ↑ 6,0 6,1 6,2 Mantan Administrator Sibolga dan Provinsial Kapusin, yang pernah tertimbun puing, meninggal, penakatolik.com, 6 November 2020, mufaigi me 7 November 2020.
  7. ↑ Pater Barnabas Winkler OFMCap. Ahli Pembangunan Fisik dan Kerohanian yang Visioner, Inspiratif dan Bersahaja, Ordo Kapusin Kustodi General Sibolga, 2018, nga'örö 14.
  8. ↑ 8,0 8,1 Priester und Architekt der Kapuzinerpräsenz, bakha ba Horizonte. Jahresbericht 2018, nga'örö 5. Tola göi mufaigi yaŵa ba gu'ö ba sini Archived 2021-01-13 at the Wayback Machine, mufaigi me 7 November 2020.
  9. ↑ Komsos Keuskupan Sibolga, Administrator Keuskupan Sibolga 2004-2007 Meninggal. Ini Jasanya bagi Katolik di Pantai Barat. Meniti 1:24
  10. ↑ Pater Barnabas Winkler OFMCap (2018), nga'örö 27 ba nga'örö-nga'örö tanö bö'ö.
  11. ↑ Pater Barnabas Winkler OFMCap (2018), nga'örö 11 ba 15.
  12. ↑ Administrator Diosesan Sibolga 2004-2007 Meninggal Dunia, hidupkatolik.com, 6 November 2020, mufaigi me 7 November 2020.
  13. ↑ Ein Lagebericht anch den Erdbeben Archived 2020-11-26 at the Wayback Machine, muenster.de, 30 Maret 2005, mufaigi me 7 November 2020
  14. ↑ 14,0 14,1 Pengalaman Pastor Barnabas Winkler OFMCap: Satu Malam Dibawah Reruntuhan Gempa. Mufaigi me 7 November 2020
  15. ↑ Pater Barnabas Winkler OFMCap (2018), nga'örö. 20

Khai-khai baero bulö'ö

Tehalö moroi ba "https://nia.wikipedia.org/w/index.php?title=Barnabas_Johan_Winkler&oldid=22169"