Fökhö Mbua
Sura andre ha börö wangi'ila, tenga fangali dokter. Lö ibe'e konsultasi medis Wikipedia. Na moguna khöu wamadöhö, si lö tola lö'ö möi ndra'ugö khö dokter ma zui nifotöi tenaga medis profesional |
Fökhö Mbua no fökhö salua na ibörögö awuwu halöŵö mbua ba wanafi'ö fefu zi ta'unö si so bakha ba nidanö giö fatua lö lumalö ia ba waya. Fökhö da'e tola alua ia ba zi lö arara (nifotöi akut) ba ma zui ba zara (lafotöi kronis).
Fökhö Mbua si lö arara andrö alua ia na ambö ndro sangele ba mbua ma zui na no abobo mbua börö me no tetiti simane na alabu niha ba telobi löwi-löwi, ma na mesokho mbua.
Fökhö Mbua sarara si to'ölönia no ida'i-da'i wa'aluania ba töra tölu waŵa wa'ara. Itugu ara itugu abölö-bölö ia ba afuriatania bua andrö tekiko ma laŵa'ö no irugi mbosi si lima (li Inggris: end stage renal disease).
Na no irugi mbosi si lima, ba lö tola mudalu-daluni ia sa'ae. Lö lala wame'e ena'ö sökhi wohalöŵönia mangawuli simane me föna.
Ibörötaigö ia fökhö da'e na so wökhö gulo, na töra abölö wamangele ndro, ma na abao mbua, ma zui na no mokara bakha mbua. Baero da'ö tola göi fao khönia wökhö tanöbö'ö simane fökhö tödö, fa'atöra wa'abölö wamangele ndro, fökhö döla ba fökhö fo'amböta ndro.[1] [2]
Tandra-tandra
Ba mböröta lö oroma sibai ba lö göi murasoi wa edöna alua wökhö mbua. Awena tebörögö terasoi ia na no irugi abölö-bölö wa'awuwu halöŵö mbua, na no hatö 10-25% moroi ba zi to'ölönia. Oroma ia na no irugi wa'abölö-bölö simane, ya'ia na mo'amböta nidanö giö ma zui lö möi baero giö. Börö da'ö fefu zi ta'unö tetaha bakha ba mboto ba tobali ia langu. Irege tohare dandra tanöbö'ö sabölö-bölö simane fa'alele mboto ma falö fa'abölö mboto, awuwu wangera-ngera, omulö-mulö dödö ba mo'uta. Börö me tebai möi baero giö, idanö si so ba mboto tetaha bakha, irege abao gahe awö danga. Simanö göi awuwu hanu-hanu me tetaha göi idanö bakha ba mbo.[3] [4]
Famofaosatö
So lima ngawalö mbosi wa'abölö-bölö wa'awuwu halöŵö mbua (li Inggris Glomerular filtration rate ma GFR):[5][6]
| Bosi | GFR (ml/min/1,73 m2) | Famotokhi |
| 1 | ≥90 | Bosi nifotöi normal, na tesöndra protein ba giö |
| 2 | 60-89 | Bosi nifotöi aoha, eluahania to'ölö alua da'a molo'ö ndröfi niha awö dandra protein si so ba giö |
| 3A | 45-59 | Bosi nifotöi sedang, eluahania ha ma'ifu risiko wa göna fökhö mbua |
| 3B | 30-44 | Bosi nifotöi sedang irugi abua, eluahania ha ma'ifu risiko wa toböhöli wohalöŵö mbua (li Indonesia gagal ginjal) |
| 4 | 15-29 | Bosi nifotöi abua, eluahania alaŵa risiko wa edöna tobali ia fökhö mbua |
| 5 | <15 | Fökhö Mbua |
| 5D | Fökhö Mbua: Moguna wanasa ndro (Hemodialisis/peritoneal dialisis) | |
| 5T | Fökhö Mbua: Moguna lafalali mbua (transplantasi ginjal) |
Diagnosis
Sasesenia ibörögö wökhö mbua andrö moroi ba wökhö gulo ba fökhö watöra abölö wamangele ndro (li Inggris hypertension) ba niha satua, ba tanö'bö'ö'nia simane:[7][8]
- Fa'abao mbua
- Fökhö nga'ötö
- Fa'atoba'a lala giö börö mbetua si tobali kara bakha ba mboto niha
- Börö dungö sangawuli furi ba mbua
- btn.
Famadöhö
Sökhi na alio mu'ohe khö doto ba wamareso. Na halöŵö mbua no irugi ambö moroi ba zi 15%, lafotöi ia sa'ae no irugi wökhö mbua (faigi yaŵa) ba fao khönia oi dandra sabölö-bölö nisura si yaŵa. Na no irugi zimane eluahania tebai sa'ae mbua wanafi'ö giö, börö da'ö moguna wanasai ndro (li Indonesia cuci darah ma asese laŵa'ö dialysis).
So dombua lala nitörö ba wanaha ena'ö böi itugu abölö-bölö wökhö da'e:
Lala si sara ba fanasa ndro. Fanasa ndro andre tola nifalua ba sambua mesin nifotöi hemodialysis, ma zui nifalua bakha ba mbetu'a (lafotöi ia peritoneal dialysis). Lala si dua ba famalali mbua, eluahania lafalali mbua si no tekiko faoma bua moroi ba niha bö'ö sedöna mamualagö buania (moroi khö dalifusö ma zui khö niha sawena mate). Tefalua da'a faoma operasi ba gödo zofökhö (lafotöi ia transplantasi ginjal). Famalali mbua andre ha tola tefalua bakha ba wuröma operasi (ruang operasi) ba gödo zofökhö.
Fökhö si fakhai
Umbu
- ↑ Chronic Kidney Disease, mufaigi me 14 Februari 2020 (Li Inggris)
- ↑ Gagal Ginjal Akut, mufaigi me 20 Januari 2020 (Li Indonesia)
- ↑ 3,0 3,1 Nurarif, A.H., & Kusuma, H. (2015), Aplikasi Asuhan Keperawatan Berdasarkan Diagnosa Medis & NANDA NIC-NOC (Jilid 2). Jogjakarta: Media Action.
- ↑ LeMone, P., Burke, K. M., & Bauldoff, G. (2013), Medical Surgical Nursing: Critical thinking in patient care. United Kingdom: Pearson Education.
- ↑ Krol, G. D. (2011). Chronic Kidney Disease: Clinical Practice Recommendations for Primary Care Physicians and Healthcare Providers. Diakses dari https://www.asn-online.org/education/training/fellows/HFHS_CKD_V6.pdf
- ↑ Kidney Disease Improving Global Outcomes. (2013). KDIGO 2012 Clinical Practice Guideline for the Evaluation and Management of Chronic Kidney Disease. Kidney International Supplements, 3(1). Diakses dari https://kdigo.org/wp-content/uploads/2017/02/KDIGO_2012_CKD_GL.pdf
- ↑ Chronic kidney disease (CKD) - Symptoms, causes, treatment, mufaigi me 14 Februari 2020 (Li Inggris)
- ↑ Chronic Kidney Disease in the United States, 2019, Centers for Disease Control and Prevention, mufaigi me 14 Februari 2020 (Li Inggris)
- ↑ Permenkes Nomor 38 Tahun 2016 tentang Penyelenggaraan Transplantasi Organ, mufaigi me 14 Februari 2020 (Li Indonesia)