Wikipedia:Goi-goi ni'adogoi'ö

Wikipedia no sambua halöŵö si lö aetu-aetu. Gofu hadia nisuramö toröi manö dania irugi zi so miföna. Si no mubunu ma mutibo'ö ba oi no terorogö manö, irege gofu hadia nifaluamö ba da'e tobali sambalö si toröi ba Wikipedia irugi zi lö aetu. Ba hiza böi muhafa dödöu! Mitou andre so wanuturu ena'ö fefu halöŵö nifaluamö ba da'e mofozu.

Ohitö dödö sindruhu Wikipedia ya'ia ba wama'anö sambua ensiklopedia si faudu ba atulö. Heŵa'ae simanö börö me lö na sa so goi-goi si tola mu'oguna'ö ba wangetu'ö hewisa ia zi faudu ba atulö andrö, no lafa'anö ira si fao awö ba Wikipedia goi-goi, lala nitörö ba lala wangai angetula si lö aetu tola te'atulö'ö.

So ösa ba gotalua lala wangai angetula andrö lö formal ia, eluahania awena aboto ba dödöu hadia ia na no öfomaha ndra'ugö hewisa ia moroi ba wamaigi-maigiu si no so, ma na ösofu khö ndra editor tanö bö'ö ma zui na labe'e khöu zöndrara. Ba hiza so göi danö bö'ö si formal (ö'ila wa formal ia na duma-dumania tebörögö döinia faoma "Wikipedia:" simane nga'örö nibasomö andre).

Oya moroi ba gotalua goi-goi andre, no hulö si fao dödö zato ba wangodödögö wolo'ö, hewisa lala wohalöŵö ba Wikipedia ba hadia zi tobali ohitö dödö ba wolau halöŵö andrö. Goi-goi andre moguna ena'ö böi alua wabu'asa sanandrösa nösi zinura ba ena'ö tobali sulu khöda ba wondrou'ö wa'atulö ngawalö zura nisurada.

Na ö'o'ö oi goi-goi ba da'e, lafolakhömi ndra'ugö. Tola manö göi wa ö'ila so samösa niha ba da'a si lö molo'ö goi-goi andre, ba hiza tola na sa tetema'ö molo'ö Wikipedia. Ba zalua simane andrö lala nitörö ba ya'ia mamologö tödö. Si to'ölönia na tebe'e wanuturu si sökhi, ya'ira si bohou manura göi mangodödögö wangalui lala sabölö sökhi ba wondrou'ö wa'atulö zinurara.

Dane-dane nitöngöniSunting

Heŵa'ae molo'ö teori fefu tola tebulö'ö, no sa'atö la'angeragö ira si fao awö ba wama'anö zi tobali dane-dane halöŵö sinangea mutöngöni. Da'e tou oi dane-dane si no mufatimba sindruhu-ndruhu ba lö tebulö ia ba zi so föna:

  1. Lima Duho Nitöngöni: ohitö dödö komunitas Wikipedia no tefurugö bakha ba lima gohitö dödö andre: Wikipedia no sambua ensiklopedia gu'ö; lala wanura ya'ia si "so-ba-gotalua" (netral); gofu haniha tola mamulö'ö, mangoguna'ö, mamazaewe nösinia; fefu ndra Wikipediawan mangodödögö ena'ö lafaoma lafosumange nawöra; lö khö Wikipedia goi-goi samöbö sibai.
  2. Prinsip ni'odanegö: Yayasan Wikimedia, no sambua amaota global samatörö Wikipedia ba proyek tanö bö'ö si fakhai, no tefasindro ba dete gohitö dödö zato, ya'ia da'ö: si lö tola lö'ö si "so-ba-gotalua" ia; gofu haniha tola mamulö'ö (arakhagö) fefu nösi Wikipedia, heŵa'ae lö na sa lafasura'ö döira; tahalö gangetula faoma huhuo nifotöi huhuo wiki; omasi ita falulu mohalöŵö ba faoma tatema'ö nawöda; ösi nisurada no lö fesu-fesu (lisensi bebas); ta'odödögö ena'ö tabe nahia ba inötö khö ndra ni'osatuagö ba wamatunö na so wabu'asa sebua. Hewisa wamazökhi komite ndra ni'osatuagö andrö, da'ö no nifatimba zato.
  3. Hak cipta: I'oguna'ö Wikipedia nifotöi lisensi bebas Creative Commons Attribution-Sharealike license ba GNU Free Documentation License. Fefu nisura ndra kontributor si lö tola lö'ö faudu ba lisensi andrö yaŵa.
  4. Böi talafu tofesu ba goi-goi: goi-goi nifa'oli ba Wikipedia lö nisura ba dete gara. The spirit of the rule trumps the letter of the rule (te'ala goi-goi nisura moroi ba gohitö dödö goi-goi si lö tesura). Ohitö dödö ba wamalulu fohalöŵö wama'anö sambua ensiklopedia, da'ö fondrege zebua. Börö da'ö tola manö ösawö goi-goi na da'ö lala ba wondrou'ö wa'asökhi ba wa'atulö nösi Wikipedia. Faigi i wa tenga göi ha asala manawö goi-goi manö.

Mama'anö ba mamulö'ö sambua suraSunting

  1. Si "so-ba-gotalua": Sura nisuramö moroi ba lala wamaigi zi so ba gotalua. Lö ibe zöndrania Wikipedia, ha i'ozaragö ma zui ifurugöi fefu zöndra si no tefazewe ba gumbu saro dödöda.
  2. Tola mufareso: si lö tola lö'ö ösi gero zura tehalö moroi ba gumbu saro dödö si no tesura ba koran, jurnal akademis ma zui buku. Odödögö wame'e gumbu andre, na lö'ö ba tola labulö'ö ia ira editor tanö bö'ö. Sakali tö: halöŵö Wikipedia ha wamurugöi ma mangarutui zöndra si no irai muraka.
  3. Tenga söndra sawena so: Tebai tesura bakha ba zura Wikipedia sambua zöndra, konsep, data ma zui teori si lö na sa laraka. Awena na no muraka ia tola öhalö ia awö fefu zöndra si no muraka tanö bö'ö, ba öhalö wurugönia tobali sambua artikel.
  4. Böi alaŵösi wanga'azökhi sambua zura: No wiki da'a, lö tola tekiko ma fakuyu ia, börö fefu hadia ia tola tefangawuli furi. Farou niha bö'ö wamulö'ö gofu hadia zi no ösura, göi ya'ira si lö sambua zöndra khöu. Na so zaombö dödömö ma zui zaombö dödö niha bö'ö, fahuhuosi manö ba nga'örö wahuhuosa!

Fariawö khö ndra kontributor tanö bö'öSunting

  1. Folakhömi niha bö'ö: Na omasi'ö öbe zöndrau sanandrösa ba sambua zura, odödögö wa tenga andrö nisurau hewisa dödöu sanandrösa khö niha sanura ya'ia. Sura ha sanandrösa ba nösi zura somasi'ö öfahuhuosi.
  2. Odödögö wo'angeragö wa ifalua hadia ia niha bö'ö faoma fa'asökhi dödö, wa ya'ira andrö niha si no atua-tua, wa ohitö dödöra göi ba wondrou'ö Wikipedia. Na ö'ila la'ide-ide'ö zi no ösura niha bö'ö (heŵa'ae no lahaogö lalöwösi ia) böi halö ba dödö, ösilömangila ia ba ö'odödögö wanguma'ö wa niha si sökhi ira. Na öhaogö wamaigi ya'ia ba edöna ösöndra wa 90% ira no niha si sökhi tödö (10% ba gotaluara lö manema na ösulöni khöra zi lö sökhi). Andrö saohagölö. Tema'ö fefu zöndra niha sanandrösa ba nisuramö faoma fa'ebolo dödö ba faigi-faigi ua na omasi'ö öfalua hadia ia.
  3. Fahuhuosi na so nibulö'ö si tola mangandrö fönu niha bö'ö ba nga'örö wahuhuosa: Faoma tafolakhömi nawöda, da'ö sambua gamuata nitötöna ba Wikipedia. Sökhi na öfahuhuosi ua zomasi ndra'ugö öbulö'ö ba zi sambua sura fatua lö öbörögö wanura ya'ia, irege tola mirugi wahasara dödö ba lö aekhu ba wasöndrata zöndra. Na no öbulö'ö hadia ia odödögö wangombakha mbörönia ena'ö aboto ba dödö editor tanö bö'ö.

Amuata si fauduSunting

Goi-goi andre tou manandrösa ba gamuata si sökhi ba faudu ba hewisa ena'ö tola ahono dödö zanura (lö khönia fa'awuwu dödö). Na ö'o'ö goi-goi andre ba lö falukha ndra'ugö wabu'asa khö ndra kontributor tanö bö'ö.

Sura wurugö wamulö'öSunting

Na öbulö'ö sambua zura böi olifugö wanura furugö fatua lö öhöndrögö publikasi ma publish changes. Moguna sibai da'a ena'ö i'ila editor tanö bö'ö hadia nibulö'ömö. Baero da'ö na öfuli öfaigi zura andrö ba zi so föna tola ö'ila hadia zi no öfalua. Sura hadia nibulö'ömö ba hana wa öbulö'ö zura andrö. Na anau mbörönia, sura ba nga'örö huhuo zura andrö.

Böi bali'ö wamulö'ö nilau faoma fa'asökhi dödöSunting

Böi bali'ö nisura niha bö'ö. Tola sa öbali'ö wamulö'ö nifotöi vandalisme (asese oroma ia ba zimane andre: "LALALALAL*&*@@THIS_SUX0RZsammygoo", ma zui samulö'ö "4+5=9" tobali "4+5=30"). Na sindruhu lö fatema khöu sambua wamulö'ö, bali'ö sakali ba be'e garutua simane "(rv) Lö fao dödögu ba nisura andre. Faigi mbörönia ba nga'örö wahuhuosa." ba sura ba nga'örö wahuhuosa hadia mbörö wa öbali'ö nösi zura andrö. Töngöni göi goi-goi tanö bö'ö sanguma'ö wa fondrege oya ha tölu kali öbali'ö sambua wamulö'ö niha bö'ö.

Oguna'ö tandra tangaSunting

Na ösura zöndramö ba nga'örö huhuo, böi olifu ndra'ugö wame tandra tanga (~~~~) ba gahe huhuomö.

Oguna'ö wangoroma'ö khala-khalaSunting

Na so, oguna'ö tombol wamaigi khala-khala zura (faigi tombol Oroma'ö khala-khalania ma "Preview" ba gahe zura) fatua lö ö'awalisi sambua zura. Awena aefa da'ö öhöndrögö tombol publikasi ma Publish page. Itaria sa lö oroma tombol andre na auri Visual Editor, börö no te'oroma'ö hewisa khala-khalania dania.

Faigi göiSunting

UmbuSunting