Fangowasaini Ekaristi

Fangowasaini Ekaristi (ma asese göi latötöi ia Misa) no töi sambua halöŵö fangandrö ba fanunö bakha ba Gereja Katolik, heza mufondrondrongo Daromali Lowalangi ba mufa'ema roti ba agu si no tobali boto ba do Keriso samösa. Ba Gereja Protestan asese göi latötöi da'a Femanga Gö Ni'amoni'ö. Fehede ekaristi tehalö moroi ba li Yunani εὐχαριστία (eucharistia), eluahania fangandrö saohagölö, sasese la'oguna'ö bakha ba zura Gamabu'ulali Sibohou.^[2] Töi andre tetohugö te'oguna'ö irugi ma'ökhö bakha ba Gereja Anglikan, Gereja Ortodoks ba mendrua manö bakha ba Gereja Katolik ba ba mato ha'uga Gereja Protestan.

Hada wangowasaini Ekaristi andre tebörögö mufalua ba ginötö ndra nifahaö Yesu samösa. Ba zi bongi fatua lö laforöfa ia, i'owuloi ndra nifahaönia ba wemanga safuria Yesu. Bakha ba wemanga safuria andrö ifahowu'ö roti ba agu tobali boto ba donia, ba i'oroi'ö khö ndra nihafahaönia ena'ö latohugö wangowasaini simane ba wanörötödö khönia. Tesura da'a si föföna sibai bakha ba zura Waulo khö Niha Keriso ba mbanua Korindro (KorI 11:23-25) ba aefa da'ö bakha ba Injil Mareko (Mar 14:22-25), Mataio (Mat 26:26-29) awö Luka (Luk 22:13-20) me imane,

Me manga ira ba zi bongi, ihalö roti Yesu, i'andrö saohagölö,^[3] iboboto roti ba ibe'e khö ndra nifahaönia imane, "Mitema ba mi'a; botogu da'e nibe'e soguna khömi." Aefa da'ö ihalö mako, i'andrö saohagölö, ibe'e khö ndra nifahaönia imane, "Mitema ba mibadu; dogu da'e, do gamabu'ula li sibohou, niduwagö soguna khömi. Mifalua zimane ba wanörötödö ya'o."^[4]

Aefa da'ö itutunö Luka bakha ba zura Halöŵö Zinenge wa lö aetu owulo ndra solohi khö Yesu ero luo Migu ba "wamoboto roti ba ba wangandrö" (HalZin 2:42; 20:7). I'otarai da'ö irugi ma'ökhö lö aetu owulo ndra Niha Keriso ba wangowasaini Ekaristi.

Töi Ekaristi

Simane si no tesura yaŵa tehalö wehede andre moroi ba Zura Ni'amoni'ö me ihalö wangandrö saohagölö Yesu. Baero döi andre la'oguna'ö göi niha Katolik ba zi sagörö ulidanö döi Misa (li Inggris mass, li Jerman Messe). Fehede andrö tehalö moroi ba li Latin missa, niŵa'ö gere ba gangahorita wangowasaini Ekaristi me imane ite missa est, eluahania ambö töra: Lau, no awai wangowasaini Ekaristi. Mi'ofanö ba mifolakhömi Lowalangi ba wa'aurimi.

Faosatö Wangowasaini Ekaristi

Famobörö

Sinunö
Fangowai
Fehede Famasao
Famalalini era-era
Litani
Sinunö Fanuno (ha ba luo Migu ba ba luo Pesta)

Liturgi Taromali

Fombaso I
Sinunö Fanemali
Fombaso II
Sinunö Föna Injil
Fombaso Injil
Homilia
Tuho Wamati
Fangandrö Niha Samati

Liturgi Ekaristi

Fama'anö Fasömbata
Sinunö Fasömbata
Fangandrö Ekaristi (li Indonesia Doa Syukur Agung)
- Prefasi
- Anamnese
- Doksologi
Komuni
- Fangandrö Zo'aya (He Ama Khöma)
- Ono Mbiri-biri
- Fanema Komuni
- Sinunö Komuni
- Fangandrö Komuni

Fangasiwai

Angombakhata
Famahowu'ö
Sinunö Fangasiwai

Umbu

↑ Gospel Figures in Art by Stefano Zuffi 2003 ISBN 978-0892367276 nga'örö 252
↑ "Strong's Greek: 2169. εὐχαριστία (eucharistia) – thankfulness, giving of thanks". Biblehub.com. Mufaigi me 2019-05-16.
↑ Ba nahia wehede i'andrö saohagölö andre tesura bakha ba teks asli ba li Yunani εὐχαριστήσας
↑ Fehede andre no mufaudugö (li Indonesia disarikan) molo'ö teks si no oi fabö'ö-bö'ö wama'oli ya'ia bakha ba Korindro I, Mareko, Mataio ba Luka.

[1] Gospel Figures in Art by Stefano Zuffi 2003 ISBN 978-0892367276 nga'örö 252

[2] "Strong's Greek: 2169. εὐχαριστία (eucharistia) – thankfulness, giving of thanks". Biblehub.com. Mufaigi me 2019-05-16.

[3] Ba nahia wehede i'andrö saohagölö andre tesura bakha ba teks asli ba li Yunani εὐχαριστήσας

[4] Fehede andre no mufaudugö (li Indonesia disarikan) molo'ö teks si no oi fabö'ö-bö'ö wama'oli ya'ia bakha ba Korindro I, Mareko, Mataio ba Luka.

[2]

[1]

[3]

[4]