Johannes Maria Hämmerle
Johannes Maria Hämmerle, OFMCap ma to'ölö lakaoni ia Pastor Yohanes (★ 9 Juli 1941) no samösa gere Gereja Katolik moroi ba danö Jerman, si tobali misionaris ba Danö Niha, ba i'otarai 1971 no tobali ia warga negara Indonesia. Tefaböbö ia ba gangowuloa fa'alowalangi sotöi Kapusin (li Latin: Ordo Fratrum Minorum Capuccinorum ma asese la'adogo'ö ia OFMCap) andrö wa asese lasura döinia Johannes M. Hämmerle, OFMCap. Götö we'asonia ba Danö Niha no toröi ba mohalöŵö ia ba zi sagörö Tanö Niha, i'otarai Telukdalam ba Nias Selatan, Gomo awö Tögizita ba Nias Tengah, ba Gunungsitoli awö Lahewa ba Nias Utara.
| Johannes Maria Hämmerle | |
|---|---|
 Pastor Johannes Hämmerle | |
| Tumbu | 9 Juli 1941 Hausach, Baden-Württemberg, Jerman |
| Halöŵö | ere Gereja Katolik; samasindro museum Nias; sanura buku; budayawan Nias |
Baero wamalua halöŵö fa'akubalo bakha ba Gereja, no göi i'owuloi ngawalö nidunö-dunö Nono Niha awö ngawalö gama-gama sifakhai ba hada Nono Niha. Furi hö ifasindro sambua museum nibe'e töi Museum Pusaka Nias si tobali nahia heza lafahaö ira niha ba hada ba ba gama-gama Nono Niha. Ya'ia göi direktur museum andre, irege lafili samösa direktur bö'ö ba tobali ia ketua yayasan sangokhögö Museum Pusaka Nias, heŵa'ae no göi iböhöli halöŵö andre me no alaŵa sibai ndröfinia.
No oya göi isura mbuku heza ifa'oli fefu nidunö-dunö ni'owuloinia moroi ba zi sagörö Tanö Niha, so nisura ba li Indonesia, li Jerman ba ba li Inggris. Baero da'ö so göi ngawalö mbuku sanandrösa Ono Niha nifa'anönia, si tobali bua wangosilinia ba Danö Niha.
Börö wangi'ilania budaya awö sejarah Nono Niha asese lafotöi ia budayawan Nias.
Publikasi
- Termasyhur - Teturia Desa Holi di Ulugawo, Nias (2021)
- Tuturan Tiga Sosok Nias (2019)
- Maena Nias: Sarana Penyampaian Pesan dan Kisah Hidup Orang Nias (2018)
- Pasukan Belanda di Kampung Para Penjagal (2017; ISBN 9786029599978)
- Turia Mazino (2017; ISBN 9786027228719)
- Daeli Sanau Talainga dan Tradisi Lisan Onowaembo Idanoi (2017; ISBN 9799574935)
- Sejarah Gereja Katolik di Pulau Nias (2015; ISBN 9786029599985)
- Geschichten und Gesänge von der Insel Nias in Indonesien (2005; ISBN 9783447058124)
- Asal Usul Masyarakat Nias: Suatu Interpretasi (2001; ISBN 9799574900)
- Hikaya Nadu (1995)
- Omo Sebua (1990)
- Fämato Harimao (1986)